नेपाली हास्यव्यङ्ग्य अनलाइन पत्रिका

भोलानाथ सुवेदी :

आउनुस् हजुर
मलाई पनि महाअभियोग
ठोक्नुस्
दाहिने हातले देब्रे हात
कन्याउन मान्दैन
आफ्नै आँखाले आफ्नै
नाके डाँडी पनि देख्दैन
डँडाल्नु चिलाए भित्तामा ढाड
घोट्नुपर्छ
बोल्न पनि बीस पटक सोच्नुपर्छ
यी लिखुरे खुट्टाले यामानको जिउ
कसरी बोक्नु
न धित मारेर बोल्न सक्छु
न मन खोलेर हाँस्न सक्छु
आउनुस् हजुर
हस्ताक्षर अभियान चलाउनुस्
मलाई पनि महाअभियोग ठोक्नुस्।
टाउकाको कपाल झरेर
तालु चिल्लो भएको छ
मान्छे ठिटो भए पनि
बुद्धि बङ्गारा धुलो पिठो
भएको छ
हिँड्दा दम फुलेर आउँछ
उभिदा शरीर गलेर आउँछ
घरी एउटा कानले मात्र सुन्छ
घरी एउटा आँखाले मात्र देख्छ
इँजार गाँठो परेको छ
फुकालेर शौच गर्न सकिएन
यो घाँडो जिन्दगी
म कसरी बाँच्न सक्छु
आउनुस् हजुर
तपाईँको के जान्छ
मलाई महाअभियोग ठोक्नुस्।

०००
(९८४३०५४१६१)