नेपाली हास्यव्यङ्ग्य अनलाइन पत्रिका

लक्ष्मण नेवटिया :

किन पर्ने अरुको भर ?
जे आत्माले बोल्छ मात्र त्यो गर।

अरूको छहारी हुन्छ, बालुवाको घर,
आफ्नै पसिना बगाई नवसिर्जना गर।
किन पर्ने अरुको भर ?
जे आत्माले बोल्छ मात्र त्यो गर।१।

काँधमा चढाई उसलाई नपुर्‍याउनु माथि,
मतलब निस्कदै जसले हान्नसक्छ लात्ती,
किन मान्ने कसैको डर ?
जे आत्माले बोल्छ मात्र त्यो गर।२।

यहाँ जे पनि हुन सम्भव छ एकदिनमा।
आस्थाको दियो, निभ्न सक्छ एकछिनमा,
किन मान्ने उसको आदेश जति पनि गर्दा कर ?
जे आत्माले बोल्छ मात्र त्यो गर ।३।

बाजले झैँ फिँजाऊ, हिम्मतको पखेटा,
आफ्नै बाटो कोर आफैं, बनेर ईमानी नेता ।
किन बगाउने आँसु कसैका सामू झरझर…
जे आत्माले बोल्छ मात्र त्यो गर।४।

जब टेक्छौ पैताला दृढ भई, धर्ती पनि काँप्छ।
आत्माको सशक्त ऊर्जाले, आकाशलाई नै नाप्छ।
शक्तिपुञ्ज स्वयं बन्छौ, नबन्दा कसैको अनुचर।
जे आत्माले बोल्छ मात्र त्यो गर।५।

०००
विराटनगर