नेपाली हास्यव्यङ्ग्य अनलाइन पत्रिका

लक्ष्मण नेवटिया :

चिसो मौसममा, चिसो हावाले
उसको जीउ चिसो छ,तर भित्र
भोकको आगो धप्धपी बल्दैछ।

त्यस आगोलाई शमन गर्न
त्यही आगो माथि पकाउन रोटी
ऊ कठयाङ्ग्रिँदै कामिरहेको
नाङ्गो खुट्टाको जोरले
ठेला तानिरहेको छ।

जता दुई पैसा बढी आउने देखियो
उतै दगुरी जाने गरेको छ।
मिहिनेत उसको तात्तातै छ
श्रम को मोल चैं चिसिएको पाएर
ऊ एक्लो हतास छ।

नुन तेल चामलको जोहो नभएर
कुहिरो को सिरकमा टाउको घुसारेर
तप्प तप्प आँसु चुहाउँदै,आज अलिक ऊ
बढी नै उदास छ।
चिसो छल्न न सकेर होइन
चिसोको छलको शिकार भएर !!

०००
विराटनगर