नेपाली हास्यव्यङ्ग्य अनलाइन पत्रिका

गायत्री लम्साल :

यो कल्कलाउँदो उमेर
लाउँलाउँ र खाउँखाउँको बेला
एकाएक तिम्रो हत्या कसरी भयो ?
तिमीलाई एक पटक अँगालोमा
बाँध्ने रहर अधूरै रह्यो ॥
अरुका आँखा छलेर
तिमीसँग डेटिङ् जान पाइन ।
राष्ट्रिय पेशा माग्नेबाट
कमाएको आफ्नै पैसोले
तिमीलाई सपिङ् गर्न भ्याइन ॥
तिमीले सिद्धान्त–सिद्धान्त
मात्र घोकाइरह्यौ,
आफ्नै शिरमा
आफ्नै हत्याराहरु
मात्र बोकाइरह्यौ ॥

अब मात्र बाँकी छ,
लाजनीति, दलनीति, ढलनीति,
बलनीति, चुनाउँनीति
जुटनीति, फुटनीति,कूटनीति
भुटनीति…..आदि आदि ..
इत्यादी सबै
सेम माने उस्तै हुन् ।
अब त आफु समेत
यसैमा बग्नुछ ॥
सबैलाई पुग्नेगरि
लोकतन्त्रलाई , अलिकति ठग्नु छ ।
देश बेचेरै भए तापनि
आफू र आफ्नालाई
पुग्नेगरि कमाउनु छ ॥
आफ्नै घरमा आगो लागेर
जम्मा भएको खरानीमा
फालाफाल रमाउनु छ ।
जसरी हुन्छ, चुनावपछि
सर्वदलिय सरकारको
एउटा हाँगो च्याप्प समाउनु छ ॥

प्रिय राजनीति,
थाहा छ तिमी उत्कृष्ट नीति हौ
चिनेर के गरौँ ?
आमाको रगत बेचेर
मतदान किनेर के गरौँ ?
मस्तसँग तातेको यो
चुनावी माओलमा
मेरो, हाम्रो अनि उसको समेत
प्यारो राजनीतिलाई
हर्दिक श्रदाञ्जली ॥।

०००
स्याङ्जा