नेपाली हास्यव्यङ्ग्य अनलाइन पत्रिका

लक्ष्मण नेवटिया :

ए मेरी प्यारी सिरक !
सिंघडालाई प्यारो आलु
त्यस्तै जाडोमा छौ तिमी
मेरी अत्यन्त प्रिय मायालु।

म सुत्न त के ? बस्न सक्दिन
तिमी बिना अहिले एक पल
तिमी टाढिँदा मेरो मुटुमा
हुन थाल्छ छट्पट हलचल।

तिमी भित्र पस्दै लुटपुटिदैं
जीउले मनाउँछ उमंग उत्कर्ष
जाडो पनि रमाइलो हुन्छ
पाएर तिम्रो न्यानो स्पर्श।

चिसोमा तिमी नै त छौ
मेरो सबैभन्दा नजीक
तिम्रो साथ पाएर साँच्चै
हुन्छु म निश्चिन्त निर्भीक।

विभिन्न कालका प्रेमकथाको
छौ साक्षी तिमी सिरक
विरहीहरूको मनव्यथाको
साथी पनि तिमी नै ए सिरक।

मेरी प्यारी सिरक तिम्रा लागि
कोही छैन ठूलो, कोही छैन सानो
जसले गर्छ माया हालेर अँगालो
बिना भेदभाव उसैलाई दिन्छौ न्यानो

तिमी भित्र कहिले व्याकुल
भएर मानिस रनभुल्ल
तिमी भित्रै मनको बाँध
फूटेर आँसु छताछुल्ल ।

जाडोभरि बस्नु मेरै भएर
ऐ मेरी सिरक! ऐ मेरी सानू !!
गर्मी लागेपछि म रोक्दिन
जता चाहना छ उतै जानू।

०००
विराटनगर