नेपाली हास्यव्यङ्ग्य अनलाइन पत्रिका

राजेन्द्रप्रसाद अधिकारी :

विषय अब चुनावको रहेन
बहश अब समयानुकुल परिवर्तन वा
योग्य उम्मेदवार को हो भन्ने पनि भएन
अक्षम, मनोरोगी वा छेपाराहरु, अझै मैदानमा
झनै खुलेर उत्रिएपछि, तिनीहरुलाई
सरम खै ? भनेर सोध्नुको पनि
औचित्य केही हुने भएन
होस, सोच र टेक्ने आधार नभएकाहरु, त्यसै मैदानमा
झनै जोस्सिएर उफ्रिएपछि, तिनीहरुलाई
गन्तव्य खै ? भनेर सोध्नुको पनि
औचित्य केही हुने भएन
अर्कोतिर आफ्नै टाउको आफैंले झिकेर
आफैंले बोकेको झोलामा जतनसाथ राखेर
आफ्नै टाउकोलाई समाजवादको रुमानी सपना देखाउँदै
आफैंलाई भुलाई रहेका गींडहरु, बेलाबखत
भीड जम्मा गर्न मात्र काम लाग्ने भएपछि, तिनीहरुलाई
चेतना वा विवेक खै ? भनेर सोध्नुको पनि
औचित्य केही हुने भएन
वास्तवमा, भेंडी चरनको हरिया घाँसमा
रमाइरहेका भेंडाहरुलाई, बजारमा बिक्ने
बारबेक्यू गरिएको सिङ्गो भेंडाको मूल्य
कति हुन्छ ? भनेर सोध्नुको पनि
औचित्य केही हुने भएन
जसरी, मालिकले पहिराई दिएको फलामे बन्धनमा
बाँचेको महशुस गरिरहेका दासहरुलाई,
हाट बजारमा तोकिने
डामिएका सुडोल शरीरको मोल
कति हुन्छ ? भनेर सोध्नुको पनि
औचित्य केही हुने भएन ।

०००
२०८२ माघ २२