नेपाली हास्यव्यङ्ग्य अनलाइन पत्रिका

हरिप्रसाद उप्रेती :

जीवनका जरादेखि हाँगाबिँगासम्म
अनि पलाउँदै झर्दै गरेका पातहरू
पाउला फेरेका मुनाहरू
टुसाएका अङ्कुरणहरू ।।

हेर्दाहेर्दै फेरिंदैछन् र झर्दैछन्
कल्पनाका हुरी बतासले
कठोरताका असिनाहरूले
चिथरेका रूपहरू हराएका छन् ।।

कहिले बिरक्तिएका खडेरी
अनि अपेक्षा र प्राप्तिका
अशन्तुलित प्रताडनाहरूलाई
पर्गेलेको बिरसिलो अनुभूति ।।

आत्मानुभूतिका पश्चातापहरू
गुमाएका अनगन्ती अवसहरू
ओइलाएका केही अपेक्षाहरू
साथी बनेका छन् एकान्तका ।।

मोहभङ्गताका सुसेलीमा
अर्थबोधक स्वर हालेर
परिप्राप्तिका सन्तुष्टी भित्र
आत्मसम्मान खोजिरहेछु ।।

आफूलाई बुझ्न नसक्ने
अनि अरूलाई चिन्न नसक्ने
अक्षमताका पहरामा ठोक्किनु पर्दा
आद्र बनेका भावना उर्लन्छन् मन भित्र ।।

अनि विचरण गर्न मनलाग्छ
आफ्नै स्वतन्त्रताको उन्मुक्त आकाशमा
मनोकाङ्क्षाका पङ्ख फिंजाएर बेगमार्दै
निर्वाध रूपमा फैलिन मनलाग्छ ।।

सफलताका उचाइमा रम्दै
अनुभवका गहिराइलाई खोतल्दै
सम्न्धका शुत्रहरूमा बाँधिएर
चल्ने गर्छ जीवनको डुङ्गा अविरल ।।

नरोकुन् कसैले नछेकुन् कसैले
सहजताका साथ बेग बिसाएर
जीवन यात्रालाई सहज पार्दै
शाश्वत सत्यलाई अङ्गाल्न मनलाग्छ ।।

०००
काठमाडाैं