नेपाली हास्यव्यङ्ग्य अनलाइन पत्रिका

पदम दाहाल :

केले भयौँ त हामी दोषी र दुष्ट पाल्ने
दुम्सी हराम जस्ता ल्यायौँ विभ्रष्ट चाल्ने ।
पर्चा रमाउँदै छन् टाँस्नै हुँदैन फालौँ
वृद्धा र वृद्ध भन्छन् सोचेर भोट हालौँ ! ।१।

सा-है सुवर्ण मौका हो यो झिकौँ न बुद्धि
के के न गर्छु भन्थे केले फुरेन बुद्धि ।
रोजौँ सुयोग्य उम्दा नेता र चोट टालौँ
वृद्धा र वृद्ध भन्छन् सोचेर भोट हालौँ ।२।

दुख्छौँ खराब आए चुक्छौँ अनिष्ट पाए
ल्याऊँ विवेक राख्ने माली कि द्वारपाले !
निर्धक्क न्यूनलाई होच्याउने नकारौँ
वृद्धा र वृद्ध भन्छन् सोचेर भोट हालौँ । ।३।

सर्वोच्च दान हो यो चानेचुने नठानौँ
हल्ला गरून् उचालून् लोभ्याउलान् नकारौँ ।
विश्वासघात गर्ने गुड्डी प्रवृत्ति त्यागौँ
वृद्धा र वृद्ध भन्छन् सोचेर भोट हालौँ।४।

हाम्रै छनोट प्यारो ताली बजोस् न भोलि
नेतृत्व न्याय निष्ठा बाली बनोस् न भोलि ।
दिक्पाल भै नबस्ने जाली कपूत फालौँ
वृद्धा र वृद्ध भन्छन् सोचेर भोट हालौँ ! ।५।

०००
मादी न.पा. ६, सङ्खुवासभा
हालः लोकन्थली, भक्तपुर ।