दिनेश पाण्डेयभताभुङ्ग भएछ देश
छी छी र दुर्दुर् कति मात्र गर्नु स्वप्ना सँगाली कति धैर्य गर्नु काला अँधेरा किन छन् दिनेश सारा भताभुङ्ग भएछ देश ।।
दिनेश पाण्डेय :
आदेश बाङ्गो उपदेश बाङ्गो
श्रीमान्हरूकै छ चरित्र नाङ्गो
पूरै उदाङ्गो किन मातृदेश
सारा भताभुङ्ग भएछ देश ।
संस्कार उल्टा व्यवहार उल्टा
आफन्त उल्टा परिवार उल्टा
दाढी हुँदा श्वेत छ श्याम केश
सारा भताभुङ्ग भएछ देश ।
मुग्लान ठेलेर हितोपदेश
प्यारो सबैमा छ सुदूरदेश
बन्दै छ यो भूमि कि बङ्गदेश
सारा भताभुङ्ग भएछ देश ।
अल्छीहरूका करमा छ बल्छी
पाल्छी छ बोली हर एक गल्छी
भाषासँगै छन् अवदीर्ण भेष
सारा भताभुङ्ग भएछ देश ।
छी छी र दुर्दुर् कति मात्र गर्नु
स्वप्ना सँगाली कति धैर्य गर्नु
काला अँधेरा किन छन् दिनेश
सारा भताभुङ्ग भएछ देश ।।
०००
काठमाडाैं
Subscribe
Login
0 Comments
Oldest
