नेपाली हास्यव्यङ्ग्य अनलाइन पत्रिका

दिनेश पाण्डेय :

बजाउँछौ तिमी भने म बन्न सक्छु बाँसुरी
सजाउँछौ तिमी भने उराल्छु प्रेममाधुरी
सिनित्त पार्छु सागरै र सक्छु चन्द्रमा छुन
प्रभो ! तिमी यता फिरे म बन्न सक्छु अर्जुन ॥

पसेर अग्निकुण्डमा तताउँदै तिखो झिर
अधर्मशील दुष्टका म रोप्छु टाउकातिर
मिले प्रणम्य चेतना स्वदेश यो सुधार्छु म
प्रभो ! तिमी यता फिरे म बन्न सक्छु अर्जुन ॥

अनन्त धार्तराष्ट्रका अनन्त धर्म छन् छली
र कंस रावणादिझैँ अनन्त छन् महाबली
स्वदेश चुस्न तम्सिने निखार्छु यी किरा घुन
प्रभो ! तिमी यता फिरे म बन्न सक्छु अर्जुन ॥

घुटुक्क कालकूटझैँ म दीनहीनका कथा
पिएर बस्छु शान्तिमा अदम्य देशका व्यथा
निमित्तमात्र सम्झिई पुकार कृष्ण ! यो सुन
प्रभो ! तिमी यता फिरे म बन्न सक्छु अर्जुन ॥

सुनी विलाप लोकको कि योजना कुनै बुन
कि वा म बुन्छु योजना मिलोस् कृपा यतै पुन:
विधर्मका जरा गडे स्वधर्म थाल्छ वा रुन
प्रभो ! तिमी यता फिरे म बन्न सक्छु अर्जुन ॥

छ कालिमामयी निशा घनान्धकार व्याप्त छ
समस्त लोक दु:खको सरित् सुमर्न बाध्य छ
सदैव आस के गरी सकिन्छ आँसुले धुन
प्रभो ! तिमी यता फिरे म बन्न सक्छु अर्जुन ॥

बिकेर दानधर्मका क्रिया पुगे खलानमा
निमोठ्छ मूल्यवृद्धिले चढेर आसमानमा
दरिद्रका चिसा चुल्हा कहाँ जिरा कहाँ नुन
प्रभो ! तिमी यता फिरे म बन्न सक्छु अर्जुन ॥

०००
०८१/०५/९