दिनेश पाण्डेयचाहिन्न भो ! मलाई
हुङ्कार नित्य गर्छस् आफ्नै बखान गाई फुङ्कारदन्त धस्छस् झम्टेर लोकलाई जोबाट साथ पाइस् धर्छस् उतै निसाना तेरो कृतघ्नताले उल्टो बग्यो जमाना ।
दिनेश पाण्डेय :
गन्दा विचारवाला जेता दिएर तैँले
आचार भ्रष्ट वाला नेता दिएर तैँले
बोक्रै समेत खाइस् ताछेर देशलाई
गर्लम्म आज ढालिस् भाँचेर देशलाई ।
पोसिस् जहान आफ्नै सोसेर देशलाई
झोसिस् कराल आगो ठोसेर देशलाई
निर्लज्ज तुच्छ हाँसो हाँस्छस् अझै मसक्क
देखी कुचाल तेरो, चस्क्यो हियो चसक्क ।
गोली समेत रेलिस् कब्जा लिएर शक्ति
पाहाजसै पछारिस् नौला मुना असत्ती !
घोलेर रक्त होली खेलिस् नि खेल्नु जत्ति
ओकल्छ यो मसीले अन्तर्यको विरक्ति ।
हुङ्कार नित्य गर्छस् आफ्नै बखान गाई
फुङ्कारदन्त धस्छस् झम्टेर लोकलाई
जोबाट साथ पाइस् धर्छस् उतै निसाना
तेरो कृतघ्नताले उल्टो बग्यो जमाना ।
माया म मान्छु मेरै मन्दार मृत्तिकाको
छाया सँगाल्छु मेरै आदर्श सभ्यताको
गर्जन्छ जो स्वयंका किल्ला स्वयं जलाई
यो राजनीति तेरो चाहिन्न भो ! मलाई ।
०००
-दिपा ०८२/०५/२९,
काठमाडाैं
धन्यवाद फित्कौली