नेपाली हास्यव्यङ्ग्य अनलाइन पत्रिका

अमर अधिकारी :

(कौसीमा आमा-छोरा घाम ताप्दै)
आमाः हेर् त छोरा ! त्यो केटाले झण्डा हल्लाउँदै मलाई “कीरा पर्‍या ! भोट हाम्लाई दिनुहोला” भनेर गयो।

छोराः हत्तेरी आमा पनि ! काँ कीरा पर्‍या भन्या हो र? कृपया भनेको हो क्या !!
१

वीरबलः माथ्लाघरे रिठ्ठे पनि लड्दै छ रे नि !

बलवीरः के बाट लड्दैछ? रुखबाट कि भीरबाट ?

वीरबलः चुनाव लड्दैछ नि! स्कूल पढ्दा सधैँ गुच्चा खेलिरहने, परीक्षामा जहिले पनि फेल भैरहने रिठ्ठेको पनि दिन आउँदोरहेछ बाबै !
२

महेशः अनि अस्तिसम्म त भोट दिन्न, बहिष्कार गर्छु भन्थ्यौ त !

रेशमः हिजो मोराहरुले टन्न रक्सी र मासु खुवाइहाले, भोट नदिए त धोका दिएको ठहरिन्छ नि।
३

शिक्षकः लौ भन त राजु, चुनाउको पूरा रुप के हो ?

राजुः चुतिया-नालायक-उरन्ठेउलो हो सर !
४

पल्लारेः भोट हाल्नकै लागि त्यत्रो खर्च गरेर बेलायतबाट किन आको होला तिम्रो छोरो ?

वल्लारेः एउटा भोट भए पनि बढ्छ, आतेजाते खर्च म व्यहोर्छु भने उम्मेदवारले, अनि आयो। केही दिन बाउआमासँग बस्न पनि त पायो।

पल्लारेः भने पनि ट्यांकीमुनि राखेको पैसा रहेछ उम्मेदवारको।
५

आमाः ए छोरा दसैँ आएकै छैन, किन हो कुटाइममा गाउँमा आको?

छोराः आउने-जाने गाडी भाडा यहिँकै एकजना उम्मेदवारले व्यहोर्ने रे आमा ! भोट केमा हाल्छु, टुंगो चाहिँ छैन।
६

ग्राहकः हैन यो रेस्टुरेन्टमा आजकल निकै भिडभाड छ नि, किन हो ?

साहुः चुनाव लागेको थाहा छैन तपाईँलाई !

ग्राहकः ए हो त नि ! यो बेला त सिनोको मोमो बनाए पनि बिक्छ बाई !
७

०००
खुंग्री, रोल्पा। हालः बुढानिलकण्ठ, काठमाडौँ।