नेपाली हास्यव्यङ्ग्य अनलाइन पत्रिका

हरेक दिन
यही ऐना अगाडि उभिएको छु
र हेरिरहेको छु–
एउटा अनाम मान्छेको
हराएको अनुहार !

यो बन्दाकोभीको टाउको
र सागका कपालहरू !
यो खोर्सानीको जिब्रो
र सिमीका ओठहरू !
यो घिरौँलाको नाक
र टमाटरका आँखाहरू !

यो लौकाको हात
र काँक्राका खुट्टाहरू !
यो अदुवाको मस्तिष्क
र प्याजका मुटुहरू !
यो रामतोरियाको लिङ्ग
र आलुका अण्डकोषहरू !

चामलको बोराद्वारा निर्मित
एउटा अराजनीतिक शरीर !
जसको नसा नसामा बगिरहेको छ
गुन्द्रुकको रगत !
युगौँदेखि यही ऐनाभित्र
मेरो विचारलाई गिज्याउँदै उभिएको
यो अनाम मान्छे को हो ?

को हो यो अनाम मान्छे ?
र हरेक दिन
किन सोधिरहेको छ
मेरो नाम ?

‘च्याउको जङ्गल’ बाट