प्रेम ओली ढकलपुरेलोकेको कुलत
प्रेमिकालाई छाड्न सक्छन्
पे्रयसीलाई छाड्न सक्छन्
उस्तै परे
श्रीमतीलाई छाड्न सक्छन्
तर सत्ता छाड्न सक्तैनन्
श्रीमतीलाई पिए राखेर भए पनि
सहयोगीको नामको
भत्ता छाड्न सक्तैनन् ।
खानै छाड्न सक्छन्
गानै छाड्न सक्छन्
मानै छाड्न सक्छन्
तर सत्ता छाड्न सक्तैनन्
सुत्केरीको नाममा भए पनि
भत्ता छाड्न सक्तैनन् ।
पान छाड्न सक्छन्
दान छाड्न सक्छन्
शान छाड्न सक्छन्
राष्ट्रिय गान छाड्न सक्छन्
भगवान छाड्न सक्छन्
तर सत्ता छाड्न सक्तैनन्
छोराछोरीको नाम हालेर भए पनि
भत्ता छाड्न सक्तैनन् ।
सुन छाड्न सक्छन्
नुन छाड्न सक्छन्
तिहुन छाड्न सक्छन्
अरु त के कुरा
तपाईंले लगाका
गुण छाड्न सक्छन्
तर सत्ता छाड्न सक्तैनन्
विदेशबाट आउने
भत्ता छाड्न सक्तैनन् ।
चुरोट छाड्न सक्छन्
रक्सी छाड्न सक्छन्
मुस्ताङ्गे गाडी छाड्न सक्छन्
महंगो साडी छाड्न सक्छन्
तर सत्ता छाड्न सक्तैनन्
बैठकमा नगए पनि
भत्ता छाड्न सक्तैनन् ।
गाउँ नै छाड्न सक्छन्
चुनाव जितेको
ठाउँ नै छाड्न सक्छन्
बाउ नै छाड्न सक्छन्
तर सत्ता छाड्न सक्तैनन्
जसरी हुन्छ
भत्ता छाड्न सक्तैनन् ।
मित्र लोक केही गर्छु भनी
राजनीतिमा पसे
तर खै कसरी
यस्तो कुलतमा फसे, फसे ।
दाङ, हाल : काठमाडौं
Subscribe
Login
0 Comments
Oldest
