नत्र सिधै तल झारिन्छ
लोकल कुखुरा सरि सडकमा मान्छे मारिन्छ
कि धन कि बल चाहियो नत्र मुद्दा हारिन्छ ।
भाग्छ दोषी उम्केर नाघ्छ शायद सीमाना
होचोको पिठ्यूँमा घोचो उही अगि सारिन्छ ।
कि पहुँच हुनु पर्यो कि त पार्टीको पुच्छर
फाकफुक आलटाल गरेर समस्या टारिन्छ ।
घटना सानो होस् या ठूलो लेनदेन नमिल्दा
मुद्दा ब्यूँताइन्छ मूर्दा चिहानबाट उतारिन्छ ।
सहानुभूतिको कुरै छोडौं छैनन् संबेदनाहरू
बोकाइ कुम्लो उठाइ सुम्लो हो भन्ने पारिन्छ ।
छैन भोगाइको अर्थ मात्र सुरासुन्दरीको स्पर्श
चाहिन्न अनुभव बिटो भए ऊ त्यसै खारिन्छ ।
मान्छे भएर बाच्नु छ भने कि दल कि बल
कि छल हुनु पर्यो नत्र सिधै तल झारिन्छ ।
तनहूँ