नेपाली हास्यव्यङ्ग्य अनलाइन पत्रिका

१.
तिमीले बोकेको फूलदानीमा बाहिर फूल भित्र छुरी रहेछ
तिमीले चुल्याएको भकारीमा बाहिर मानो भित्र मुरी रहेछ
के थाहा मलाई तिमी देखिन्छौ एकथोक र छौ अर्कै थोक
तिमीले देखाएको मौसममा बाहिर हावा र भित्र हुरी रहेछ ।

२.
मानिसहरू रङ फेरिरहन कति सिपालु हुन्छन्
रातभरि हाँडीघोप्टे अनि दिनभरि दयालु हुन्छन्
कसको मनमा के हुन्छ पत्ता लगाउनै कति गाह्रो
तुरून्तै विषालु अनि तुरून्तै कृपालु हुन्छन् ।

३.
घरी एउटा पार्टीमा घरी अर्को पार्टीमा आहा ! कस्तो गतिलो राजनीति
जीवनभरि एउटै पार्टीमा र एउटै सिद्धान्तमा कस्तो बिजोगको राजनीति
यो हामीजस्ता सोझासाझाको जमाना होइन रहेछ हजुर ! रङ फेरिरहनु पर्छ
हिजो खाली खुट्टा आज छेलोखेलो सम्पत्ति साह्रै गजबको राजनीति ।

४.
जसलाई हँसायो उसैले रूवाउँछ भन्ने कुरो के थाहा !
जसलाई पर्ख्यो उसैले छोडेर हिँड्छ भन्ने कुरो के थाहा !
साह्रै स्वार्थी रहेछ यो संसार सबै आ–आफ्ना स्वार्थमा डुबेका रहेछन्
जसलाई ज्यान दियो उसैले ज्यान लिन्छ भन्ने कुरो के थाहा ।

हेटौंडा