नेपाली हास्यव्यङ्ग्य अनलाइन पत्रिका

साँच्चिकै डिँगो भए त कुरा ठिकै पनि हो तर आकार मान्छेको जस्तो बानीव्यहोरा र कार्यशैली जनावरको जस्तो भएका अर्धमानव वा अर्धजनावरहरूका लागि यो भनाइ कति उपयुक्त होला कुन्नि ! यसको साटो त यसो भन्नु अझै सुहाउँदो हुन्छ होला– ‘खौलोमा परे पनि मान्छेले चेत्दैन’ । नत्र त कविशिरोमणिले बुद्धिविनोदमा किन यसो भन्नु पथ्र्याे र–
‘यसो गरेदेखि परिन्छ नेलमा
भनी बुझेकै छ तथापि जेलमा
परीरहेकै दुनियाँ अहो किन ?
तँलाइ मालुम छ कि यो कुरा मन ।।’

अपराध गरे थुन्छन् भन्ने थाहा छ, तर अपराध गरेकै छ मान्छेले । चोरी, डकैती, गुण्डागर्दी जस्ता अपराध रुघाखोकी भैmँ मामुली भैसके । हत्या हिंसा बलात्कार पनि अब क्षयरोगभन्दा कम रहेन । भ्रष्टाचारी र तस्करी त क्यान्सरै हुन् । आखिर यी सबै अपराध मच्चाउने अपराधीका निम्ति न हो जेल बनेको । मान्छेले चेत्ने भए आज जेल बन्ने ठाउँमा मन्दिर बन्थे होला, विद्यालय बन्थे होला । खै ? सबै जेल खचाखच छन् । मान्छेले आफू चेतनशील प्राणी भनेर फूर्ति गर्नु मात्र भो । चेतना पसेको भए कतिपटक पुलिसको डण्डा खाइसक्दा पनि सुधार हुँदैन । त्यसै त अलिक बुद्धि नभएको मान्छे रहेछ भने कस्तो गोरु रहेछ ! भनेर उपमा दिइन्छ अझ तँलाई गधा भनेर पनि कसैको थुतुनाबाट निस्किन्छ । यो त सरासर मान्छेलाई पशुसँग दाँज्न खोजेको हो । खौलोमा परेपछि डिँगोले चेत्ने भए खौलोमा परेपछि मान्छे बन्नु पर्ने ! तर डिँगो डिँगै रहन्छ मान्छे त मरिगए बन्दैन । उसो भए कारागारलाई खौलोमा परेका डिँगाहरूको चिडियाखाना भने भएन र ?

कैयौँ पल्ट आफू खौलामा परेर पनि देशै खौलामा जाकिसकेका हाम्रा देशका नेताहरूले त अझै चेतेका छैनन् अब चेत्छ डिँगाले ! पहिलो संविधान सभाको चुनावमा कति अरब स्वाहा पारेर देशै डिँगो झैं नाङ्गो पारे । फेरि दोस्रो चुनावमा चालीस अरब ध्वस्त ! डिँगाले बरु छेर्छु कि भनेर घाँस खान विचार पुर्याउला तर यिनीहरूले कति खाए खाए । कतिपयले त हुक्काँ हुक्काँ गर्दागर्दै हार पनि खाए । कतिले भने स्युरी खेल्दाखेल्दै खौलामा परेको पनि थाहा पाएनन् । खौलाबाट बल्लतल्ल निस्केकाले पनि कुकुरको पुच्छर बन्न छोडेनन् । अगुल्टाले हानेको कुकुर विजुली चम्किँदा तर्से जस्तै तर्से भने त केही काम लाग्ला नत्र चुच्चे ढुङ्गो उही टुङ्गो भने झैं संविधान बन्ने छाँट छैन । अघिल्लो पटकको संविधान सभामा साँच्चिकै यिनीहरू खौलामा परेका हुन् भने पक्कै चेत्लान् होइन भने म यो उखान उल्ट्याएर खौलोमा परेपछि डिँगो पनि चेत्छ भन्न छोडेर ‘खौलामा परे पनि मान्छेले चेत्दैन ।’ भन्ने गराए फेरि अर्को बखान गर्ने झोँक चलाउँछु ।

बम्घा, गुल्मी