नेपाली हास्यव्यङ्ग्य अनलाइन पत्रिका

संविधानसभाका अध्यक्ष सुवास नेम्वाङले शनिबार राजधानीको भृकुटीमण्डपमा बृहत राष्ट्रिय पुस्तक प्रदर्शनी तथा साहित्यिक यात्रा महोत्सवको दोस्रो दिन कवि देवी नेपालको कवितासङ्ग्रह सलादजस्तो देशको विमोचन गर्नुभयो ।

पुस्तक विमोचन गर्दै अध्यक्ष नेम्वाङले भने जसरी सलादमा काँक्रो, गाजर, मुला र प्याज सबैको अस्तित्व हुन्छ त्यसैगरी विविध जाति, भाषा र संस्कृतिका नेपालीको साझा दस्तावेजको रुपमा संविधान बनाउने हामी कोशिस गरिरहेका छौँ । उनले नयाँ संविधान कुनै एक जाति, एक भाषा वा एक दलको नभई सबैको हुने बताउनु भयो ।

कार्यक्रममा विमोचित कृति सलादजस्तो देशको बारेमा रामप्रसाद ज्ञवाली र नवराज लम्सालले टिप्पणी गर्नुभएको थियो । बसिबियाँलोले आयोजना गरेको यो कार्यक्रमको संयोजन अनिल पौडेलद्वारा गरिएको हो । कार्यक्रममा नेपाल प्रज्ञा प्रतिष्ठानका कुलपति प्रा. गङ्गाप्रसाद उप्रेती, साहित्यकार कमलमणि दीक्षित, मोदनाथ प्रश्रित, प्रा.डा. वासुदेव त्रिपाठी, प्रदीप ज्ञवाली, प्रा. राजेन्द्र सुवेदी, डा. रामप्रसाद ज्ञवाली लगायतको उपस्थिति थियो ।
जनगायक रामकृष्ण दुवाल, जय गौडेल, रञ्जना पौडेल, सुदेश सत्याल, केशव भट्टराई र अनुज्ञा एम् प्रविज्ञाले कृतिमा समाविष्ट कविताहरूको जीवन्त वाचन गर्नुभएको थियो । निम्तोलाई स्वीकार गरेर कार्यक्रममा सहभागी सबैलाई स्रष्टा देवी नेपालले हार्दिक धन्यवाद ज्ञापन गर्नुभयो । हेम भण्डारीद्वारा कार्यक्रमको सञ्चालन गरिको थियो ।

प्रस्तुतिः अरुणबहादुर खत्री ‘नदी’