नेपाली हास्यव्यङ्ग्य अनलाइन पत्रिका

चेतनाशून्य आफैं छ विश्व–चैतन्यका कुरा !
स्वार्थमै लिप्त मान्छेका विश्व–वन्धुत्वका कुरा !
माटोमा श्रम खर्चिन्न लड्न खैँचन्छ पाखुरा
ब्वाँसोको भेषमा आफैं निमोठ्दै हिँड्छ आँकुरा !

व्यवहार सधैं उस्तै अहङ्कार र दम्भका
आलोचना उही गर्छ गुरु, ईश्वरसम्मका !
‘केही छैन यहाँ !’ भन्दै राष्ट्र बेकार ठान्दछ
सिर्जना गर्नका लागि विदेशी बास छान्दछ !

भन्छ बन्जर धर्तीमा पसिना पोख्नु व्यर्थ छ
अकुत धनको भोग यही तात्विक अर्थ छ !
संवेदित भई पोख्थ्यो विचार राष्ट्रभावका
अब बहस गर्दैछ पाश्चात्यकै प्रभावका !

भन्छ जन्जिर हुन् हाम्रा नाता, धर्म र संस्कृति
यिनी बन्धन हुन् जस्ले हुन्छ हाम्रै अवन्नति !
चाहियो भन्छ उन्मुक्ति नर्कमा किन भासिने ?
बुझिएन यतै हो वा उता गैकन मासिने ?

दाङ