नेपाली हास्यव्यङ्ग्य अनलाइन पत्रिका

जब जब नारीका निम्ति भनेर
नयाँ विधेयक बजारमा सुनिन्छ
बिरामी नै हुनुहुन्छ हजुर
बिरोध, खालि बिरोध गर्नुहुन्छ
मानौं,
अब चाँडै यो घरमा
पुरानो सत्ता ढल्दै छ ।
पति महोदय,
तपाईंको सत्ता तपाईं नै चलाउनुहोस्
अब हजार वर्ष राज गर्नुहोस् तपाईं
तर कृपया,
राम्रोलाई राम्रो
र नराम्रोलाई नराम्रो भनिदिनुहोस्
मेरो पति,
कम्तिमा साँचोलाई साँचो भनिदिनोस् !
सबै मरेर आफू भित्र
पति मात्र जीवित उभिनुहुन्छ मेरो सामु
सिर्फ पति !
र भन्नुहुन्छ–
“मलाई पोथी बासेको मन पर्दैन ।”
आफूभित्र,
मरेको छोरोलाई ब्युँताउनुहोस् आफूबाट
र आमाको काखमा मुन्टो जोतेर रुनुहोस्
ब्युँताउनुहोस् भाइलाई आफूबाट
र दिदीको अगाडि घुँडा टेकेर माफी माग्नुहोस्
यो छोरीले अपसोच मान्ली कुनै दिन बाबु सम्झेर
थुक्ली पूजा गर्ने तस्बीरमा
कि यसलाई न्याय दिनुहोस कि त मारिदिनुहोस् !
मेरो प्यारो पति !
खै ! किन किन,
मलाई लाग्दै लाग्दैन
कि मेरो छोरो
बाबुको बिचारको उताराधिकारी बन्न
हतार हतार हुर्किरहेको छ !