धनी हुने सपना
गाउँ बेच्छु अनि मैले शहर बेच्छु धनी हुन्छु
उस्तै परे बिहानीको प्रहर बेच्छु धनी हुन्छु
कोही भए किन्न आउ सस्तो मूल्य राखेको छु
बिपना मै मेरा सबै रहर बेच्छु धनी हुन्छु
बिचल्लीमा परे परुन् बिचरा ती गण्डक बासी
कैलै पानी नआउने त्यो नहर बेच्छु धनी हुन्छु
प्रेममा नै धोका पाई बिष पिउने धेरै भेटें
पिउना साथै मारिहाल्ने जहर बेच्छु धनी हुन्छु
गरिबीको बिल्ला भिरी कतिन्जेल बाँची राख्नु
जे जे परोस् अब आफ्नै ठहर बेच्छु धनी हुन्छु ।
जहदा, नवलपरासी