नेपाली हास्यव्यङ्ग्य अनलाइन पत्रिका

मलाई जेलमा नराख
जेलका भित्ताहरू विषाक्त बन्न सक्छन्
मलाई हेर्नेहरू बिग्रिएर
मैजस्ता हिंस्रक बन्न सक्छन्
सक्छौ मार मलाई
सक्दैनौ यहाँबाट सार मलाई
एउटा चिडिया घरमा
जहाँ बघिनीविनाको बाघ होस्
जहाँ फूलको कुनै सुवास होइन
फोहोरमैलाको राग होस्
होऽ बाघले पनि नखान सक्छ
मेरो सास पनि नजान सक्छ
मलाई मरेको वहाना बनाएर
बाँसमा कसेर लैजाऊ
तर मसानमा नजलाऊ
मेरो शरीरबाट निस्केको धुवाँले
वायुमण्डल विषाक्त बन्न सक्छ
मेरो धुवाँ पिएकाहरू मैंजस्ता बन्न सक्छन्
मलाई गहिरो खाल्डोभित्र गाड
जुन ठूलो भूकम्प जाँदा पनि माथि नआओस्
मेरो लाशलाई माटोभन्दा अलग बनाएर गाड
किनभने माटोमा भावना हुन्छ
नरसाउने ढुङ्गाले घेर मलाई
त्यसमाथि प्लाष्टिकले छोप मलाई
मेरो आत्मा कसैगरी माथि आउन नपाओस्
ताकि कतै कोपिलाहरू नच्यातिऊन्
कतै पूजाहरूको धुजा नहोस्
कतै पुरुषहरूमाथि ग्लानिको भाव नपलाओस्
म धर्तीको अनोठो पशु
म सृष्टिभित्रको व्यभिचारी
म फूलजस्ता नानीहरूको
जीवन च्यात्ने बलात्कारी ।
धादिङ