नेपाली हास्यव्यङ्ग्य अनलाइन पत्रिका

डुङ्गालाई बन्चरोको स्वभाव नसोध त मित्र !
ढुङ्गालाई जिलेटिनको प्रभाव नसोध त मित्र !

काँडासँग फूल बरु हाँस्न सक्ला आँखा चिम्ली
मृगलाई हुँडारको झुकाव नसोध त मित्र !

खपी पची काम फत्ते गर्नै पर्ने रीत नै हो
सिलौटोलाई लोहोरोको दबाव नसोध त मित्र !

बिना स्वार्थ भए मात्र आशक्तिको मात्रा हुन्न
माछोलाई पोखरीको लगाव नसोध त मित्र !

विश्वास भए झारै देउता नहुँदामा मित्रै दानव
‘दुर्गा’लाई दैवत्वको बचाव नसोध त मित्र !
२०७१ चैत्र, काठमाडौ