नेपाली हास्यव्यङ्ग्य अनलाइन पत्रिका

अमेरीकाको चरो नेपालमै आउँछ
नेपालको चरो युरोप गई गाउँछ
चराले चरालाई छैक्दैन भने
मान्छे त तिम्रो सर्वश्रेष्ठ प्राणी
फेरि मान्छेले मान्छेलाई छेक्ने किन
भन प्रभु कहिले आउँछ
यो पृथ्वी एउटै भएको दिन ।

कर्णालीको माछा महासागर गई घुम्दछ
सागरको माछा हिम नदी आइ चुम्दछ
माछाले माछाको सीमाङ्कन कोर्दैन
माछाले त माछाको नाता तोड्दैन
मान्छे त तिम्रो चेतनशील प्राणी
फेरि मान्छेले मान्छेलाई छेक्ने किन
भन प्रभु कहिले आउँछ
यो पृथ्वी एउटै भएको दिन ।

सागरको पानी बादल भई
पहाडमा पर्दछ
हिमाली पानी गड्किँदै
सागरमा झर्दछ
पानीले पानीसँग पानी बार्दैन
सागरले सगरको मायाँ मार्दैन
मान्छे त तिम्रो विवेकशील प्राणी
फेरि मान्छेले मान्छेलाई छेक्ने किन
भन प्रभु कहिले आउँछ
यो पृथ्वी एउटै भएको दिन ।

नेपाली हिमालले
खाँडीको हावा छेक्दैन
नेपाली हावाले अरबी हावामा
कुनै फरक देख्दैन भने
मान्छे त तिम्रो आफ्नै रुप
फेरि मान्छेले मान्छेलाई छेक्ने किन
भन प्रभु कहिले आउँछ
यो पृथ्वी एउटै भएको दिन ।
दाङ, हाल– काठमाडौं