नेपाली हास्यव्यङ्ग्य अनलाइन पत्रिका

डोरीलाई नाग देख्यौ, धन्न तिम्रा आँखा !
बिरालोमा बाघ देख्यौ, धन्न तिम्रा आँखा !!

यति मिठो सुरिलो छ यो पन्क्षीको भाका
कोइलीमा काग देख्यौ, धन्न तिम्रा आँखा !

कस्तो तिम्रो तिथि मिति कस्तो तिम्रो पात्रो
बाह्रै मास माघ देख्यौ, धन्न तिम्रा आँखा !

कति सफा कति कन्चन छ यो जिन्दगानी
यसमा पनि दाग देख्यौ, धन्न तिम्रा आँखा !

बालुवा र खरानी छ तिम्रो सिद्धान्तमा
वाह साथी ! वाग देख्यौ, धन्न तिम्रा आँखा !
चितवन