नेपाली हास्यव्यङ्ग्य अनलाइन पत्रिका

“बनिनसक्दै चर्कन थाल्यो आकाशे पुल” शीर्षक दिएर ठुल्ठुला अक्षरमा चर्चित पत्रिकामा फोटोसहित समाचार छापियो । अफिसमा हल्लिखल्ली मच्चियो । तुरुन्तै सब–इन्जिनियरलाई हाजिर गराइयो ।

“मैले त इन्जिनियर साहेबको निर्देशन बमोजिम गरेको हुँ !” सब–इन्जिनियर पन्छिए ।

इन्जिनियरलाई बोलाइयो ।
“ठेकेदारले यसको जिम्मा लिनु पर्छ । उसलाई प्रत्येक काम नक्सा र स्पेसिफिकेसन अनुसार गर्न भनिएको छ !” इन्जिनियर चोखो भए ।

ठेकेदारलाई ताकेता गरियो ।
“कन्सल्ट्यान्टले जे जे भने त्यहि त्यहि गर्यौँ । के जान्नु हामी, चर्किन्छ कि लड्छ !” ठेकेदार झर्किए ।

कन्सल्ट्यान्ट झिकाइयो ।
“विश्व मापदण्ड अनुसार डिजाइन गरिएको हो ! जापानमा त्यहि अनुसार गर्दा मजबुत हुने यहाँ चैं….! माटोकै कारणले हुनु पर्छ । माटोको परीक्षण प्रतिवेदन अनुसार गरेका हौँ हामीले !” कन्सल्ट्यान्टले प्रस्ट्याए ।

“ड्रिल गर्नेले दिएको तथ्याङ्क अनुसार रिपोर्ट तैयार गरिएको हो ।” माटो प्राविधिकले स्पष्टीकरण दिए ।

बुझ्दैजाँदा थाहा भयो, माटो परीक्षण गर्ने कम्पनिको चौकिदारले बोरिङ गर्ने पेटी कन्ट्र्याक्टमा काम लिएको रहेछ ।
चौकीदार बीरबहादुर केही दिनदेखि प्रहरी हिरासतमा छ ।
काठमाडौँ