नेपाली हास्यव्यङ्ग्य अनलाइन पत्रिका

हल्यो हल्यो हल्यो, जति हल्ले पनि उहीं नै थलियो
गजब छ भाग्य भनेको, नेपालीको पुर्पुरै बलियो ।

देखे राम्री केटी, पछि पछि लागी घरैसम्म आए
परिछन् तेस्रो लिङ्गी, यसपछि त अमीलो मुख पो लाए ।

छोला मैयाँ भन्दै, पर अझ पर बसेका ब्रह्मचारी
ध्यान गरेका भन्दै, उर हेर्थे चिम्से आँखा पारी ।

शिष्टै शिष्ट यहाँ छन्, उनले गरे शिष्टाचार हुन्छ
भ्रष्ट यहाँ खै छैनन्, त अनि कसरी भ्रष्टाचार हुन्छ ।

पाँचै महिनाभित्रै, बढी फली पाक्छ बोटमा धान
हाम्रा नेता कस्ता, सात वर्ष पनि फलेन संविधान ।

रातभरी म्यारेजै, खेलेर बिहान जाँच दिन आए
परिचयपत्र भनेको, जोकर जेबको झिकी तेर्स्याए ।

कुरमा माछा देखे, हत्तपत्त समाउन हात हालेँ
परेछ सिङ्गे माछो, जब घोच्यो हन्हन जरो निकाले ।

फोहरदानमा सँगै, रुँदै थिए दुई फूलका माला
सय अनि बीस किलोका, भने क्या भ्रष्टका चुम्यौँ गाला ।
काठमाडौं