नेपाली हास्यव्यङ्ग्य अनलाइन पत्रिका

दिल्ली दर्शन गर्न भक्तजनको ताँती गयो रे हरे
मोदीसाथ बसेर बैठकहरू चल्दैछ चल्दैछ रे
मीठो कीर्तन मन्त्र वा भजन यो, जे जे भनेता पनि
जे चल्दै छ उता दुरुस्त म यता लेख्दै छु लेखूँ भनी ।

रोक्नुस् ग्यास र तेल कत्ति नदिनुस् नाका नखोल्नुस् हरि !
नेपाली जनता मरे मरिरहून् क्यै हुन्न मान्छे मरी
केरा आलु पिंडालु छिर्न दिनुहोस् बिग्रेसडेका जति
रोक्नुस् माल अरू अझै हुन दिनुस् नेपालको दुर्गति ।

तिम्रो भारतकै त हो नि लिनुहोस् हाम्रो तराई जिमी
हाम्रा मालिक भन्नु खास भगवान् मोदी तिमी हौ तिमी
हाम्रो तीर्थ तिमी प्रयाग र गया काशी सबै हौ तिमी
बाबा भारत देशका मुनि तिमी ठूला महात्मा तिमी ।

आयौं दर्शन गर्न दर्शन दिनुस् यो भक्ति पूजा लिनुस्
छुट्टै राज्य मिलोस् मधेशतिरको लौ मुख्यमन्त्री दिनुुस्
हाम्रो राज्य मिले पछाडि त अझै हामी मिलौंला अनि
कल्ले सक्छ बिरोध गर्न त्यसको सक्दैन कोही पनि ।

हे मोदी प्रभु ! हे दिलाइदिनुहोस् त्यो राज्य हाम्रो अब
आशीर्वाद दिनुस् पर्यौं चरणमा हे नाथ हे भैरव
हे मोदी भगवान् पर्यौं शरणमा यो भक्ति स्वीकार्नुहोस्
स्वामी साथ दिनुस् प्रभो हजुरले रक्षा सदा गर्नुहोस् ।

लमजुङ, हाल : अमेरिका