नेपाली हास्यव्यङ्ग्य अनलाइन पत्रिका

कहाँ भोक मर्थ्यो सुनी मात्र बोली
यहाँ मर्न लाग्यौं स्वयं पेट पोली
उनी हिंड्दछन् वस्त्र सर्वाङ्ग खोली
लगाओ न खोजेर सारी र चोली ।।

कतै ग्याँस आएन गन्धै छ चर्को
कुरा वायुविद्युत् निकाल्ने जमर्को
खसी दूध देला कि आशा छ भोलि
कहाँ खर्च होस् वायुको हान्न गोली ।।

ढलाएर भूकम्पले जीर्ण झुप्रो
बस्यौं चौरमा स्याउलाको छ खोप्रो
न छन् अन्नदाना न भाँडो छ पानी
झर्यो फर्फरी शीत छर्दै हिमानी ।।

म झण्डा उठाई न ता सक्छु ओढ्न
न ता ओढनी झैं बनाएर जोड्न
लिई नाम हाम्रै कुनै भर्छ झोली
उनी मस्त छन् खालि गर्दै ठिटोली ।।
जय नेपाल !!!

काठमाडौं