नेपाली हास्यव्यङ्ग्य अनलाइन पत्रिका

पोखरा, १५ माघ ।नेपाल लिट्रेचर फेस्टिबल (साहित्य महोत्सव) को पाँचौँ संस्करण पर्यटकीय नगरी पोखरास्थित नेपाल पर्यटन बोर्डको कार्यालय परिसर, पार्दीमा शुक्रबारदेखि सुरु भएको छ ।

बुक वर्म फाउन्डेसनको आयोजना एवम् र्यान्डम रिडर्स सोसाइटीको सहआयोजनामा आयोजित महोत्सवको उद्घाटन साहित्यकार कर्णेल जेपी क्रसले गर्दै महोत्सवले यहाँको कला संस्कृतिलाई थप उजागर गर्ने विश्वास उनले व्यक्त गरे ।
साहित्यकार तीर्थ श्रेष्ठले फेवातालको किनारमा सञ्चालित महोत्सवले यहाँको पर्यटकीय विकासलाई पनि महत्वपूर्ण सहयोग गर्ने बताए । फाउन्डेसनका निर्देशक अजित बरालले विसं २०६८ देखि सुरु भएको महोत्सव काठमाण्डु हुँदै पहिलो पटक पोखरालाई सांस्कृतिक रुपले पनि सुन्दर बनाउन गर्न लागिएको जानकारी दिए ।

उक्त अवसरमा व्यवस्थापिका–संसद्, विकास समितिका सभापति रवीन्द्र अधिकारीद्वारा लिखित ‘समृद्ध नेपाल’ शीर्षकको पुस्तक विमोचन गरिएको थियो । नेपालको विकास र समृद्धिका सन्दर्भमा लेखिएको उक्त पुस्तक फाइनप्रिन्ट प्रकाशन गृहले प्रकाशनमा ल्याएको हो । पुस्तकमा नेता अधिकारीले आफ्नो विद्यार्थी कालका अनुभवका साथै व्यवस्थापिका–संसदमा लेखा समिति र विकास समितिमा बसेर गरेका अनुभवलाई उल्लेख गरेका छन् ।

पुस्तकको समीक्षा गर्दै झलक सुवेदी, सूर्यराज आचार्य र स्वर्णिम वाग्लेले कृतिमा नेपालको विकास कहाँ र कसरी गर्न सकिन्छ भन्ने लगायतका सन्दर्भमा महत्वपूर्ण विचार समेटिएको धारणा राखे । तीन दिनसम्म चल्ने महोत्सवमा साहित्यका विविध आयामका साथै दैनिक जीवनसँग प्रत्यक्ष सरोकार राख्ने राजनीतिक, सामाजिक, सांस्कृतिक, आर्थिक विषयमा छलफल र बहस गरिने छ ।