नेपाली हास्यव्यङ्ग्य अनलाइन पत्रिका

टुँडीखेल हो कि भुँडीखेल
तर देखिन्छ यहाँ
हरेक दिन अनेक खेल
गर्दै मान्छेको ठेलमठेल
नेता आउँछ
मात्र भाषण ठोक्छ
जनता आउँछ ताली ठोक्दै
खाली आश्वासन बोक्छ
भक्तालु पनि आउँछ
भद्रकाली, महाकाललाई ढोग्छ
पोके ब्यापारी आउँछ
सस्तो माल भनि खोक्छ
डोके ब्यापारी आउँछ
कराउँदै फलफूल जोख्छ
नगर प्रहरी आउँछ
उठाउँदै सबलाई गाडीमा बोक्छ
भोकाएको आउँछ
भुटन र रोटी टोक्छ
रोगाएको आउँछ
चन्दा माग्दै बिलापहरू पोख्छ
विद्यार्थी आउँछ
पुराना किताबहरू
दिनभर त्यहीँ बसी घोक्छ
पागल पनि आउँछ
चिच्याउँदै रिसराग पोख्छ
ज्योतिषी आउँछ
जोखना हेर्दै मान्छेको भविष्य खोक्छ
जादुगर आउँछ
फलाक्दै भिडभाडलाई रोक्छ
बगलीमारा आउँछ
खल्ती मार्ने मौका छोप्छ
भिखारी आउँछ माग्दै छाती ठोक्छ
जून आउँछ
मातिदै मातमा निशालाई भोग्छ
कुकुर पनि आउँछ तुर्काउँदै सीमा तोक्छ
हेर्दै यो सारा खेल
बिचरा टुँडखेल
कहिले लाजले आँखा छोप्छ
कहिले टेन्सनले टाउको ठोक्छ ।

दाङ, हाल:काठमाडौं