नेपाली हास्यव्यङ्ग्य अनलाइन पत्रिका

उसैगरि

उदाउने र अस्ताउने छ
आँगनमा जून र घाम
चल्नेछ बतास
बास्ने छ कुखुराको भाले
घुर्नेछन् ढुकुर खलियानमा
चिर्बिराउनेछ गौंथली
उसैगरी
चोर्नेछ चल्ला स्यालले
झम्टिनेछ वाजले परेवा
उसैगरि
खोलाका कुनै किनारामा
चुसाउँदै निरस लाम्टाहरू
गिट्टी कुटिरहेका हुनेछन्
भोका आमा र दिदीहरू
उसैगरि
कसैले फालेका जूठो चाटेर
सडक महोत्सव मनाउनेछन्
कुपोषणग्रस्त नानीहरू
बाल अधिकारका किस्सा हालेर
ठोक्नेछ कुनै नेताले भाषण
धरौटीको अभावमा
असामयिक मर्नेछन् जिन्दगीहरू
नाङ्गो आकाश ओढेर
सपना बाँचिरहनेछन् भूकम्प पीडितहरू
उसैगरि
चुहिने छैन कुनै झुपडीमा
एक झुल्को उज्यालो
आउने छैन यी वस्तीमा
एक फाँक खुशी
आल्हाद या आवेशमा
न ओर्लिने छ आकाश
न उचालिने छ धर्ती
उसैगरि
बगिरहने छ समय
बगिरहनेछौं हामीहरू ।