नेपाली हास्यव्यङ्ग्य अनलाइन पत्रिका

अथ समर्थनकृतं मदिरा स्तोत्रं प्रारभ्यते

शिक्षक मदिरा पुस्तक मदिरा
शिक्षार्थी अनि शिक्षा मदिरा
मदिराकै यो शिक्षालय हो
सबको साझा मदिरालय हो ।

यसको बलले खुल्दछ सत्य
गोप्य रहन्नन् कुनै रहस्य
सबकुछ खुल्ने शौचालय हो
भेद नगर्ने मदिरालय हो ।

पस्छन् मान्छे शिर निहुराई
पोख्छन् पीडा सबै सुनाई
मानौं यो पो देवालय हो
सबको प्यारो मदिरालय हो ।

नचढेसम्मन् भेटी पाती
पर्छन् सारा तारिख थाती
न्याय बिगार्ने न्यायालय हो
पुनरावेदन मदिरालय हो ।

एक अँगालो मार्दछ आई
अर्काे हिँड्दछ लिई बिदाई
यात्राको यो प्रेक्षालय हो
यो दुनियाँ नै मदिरालय हो ।

नगराजस्तै भुँडी बढाई
बसी मेचमा काढी हाई
राष्ट्र बिगार्ने मन्त्रालय हो
सबै सपार्ने मदिरालय हो ।

पत्र बुझाऊ अहिले जाऊ
हाकिम छैनन् भोली आऊ
भन्दै टार्ने कार्यालय हो
कुरा बटार्ने मदिरालय हो ।

छोराछोरी दाजु र भाइ
बाबा आमा पत्नीलाई
बिर्सन सक्ने योग समय हो
विश्रान्तिस्थल मदिरालय हो ।

यसमै सिर्जन यसमै लय छ
यसमै हार छ यसमै जय छ
भीतहरूका निम्ति अभय हो
सबको आश्रय मदिरालय हो ।

इति मदिरा स्तोत्रं अपूर्णम् ।

बुटवल