नेपाली हास्यव्यङ्ग्य अनलाइन पत्रिका

अर्काको शिरमा गीर खेली मोटाउने मन
भए मेरा कुरा मान किताबपसले बन ।।

छाप्नेले बेच्न सक्तैन पसलै जानु पर्दछ
कमीशन दिने शर्त उसकै मान्नु पर्दछ ।।

बिके पैसा सबै आफ्नै खल्तीमा राख्न पाइयो
नबिके के छ घाटा र घरमै चाङ लाइयो ।।

धनी आएर सोधेमा बिकेको छैन भन्दिनू
किताब खै भनी मागे खोज्नु पर्दछ भन्दिनू ।।

कहिले खोजिदिन्छौ त भने पन्ध्र दिनै लिनू
फेरि आयो भनेदेखि अर्को तारेख लाउनू ।।

धाउँदा धाउँदा जुत्ता खिइन्छन् जब घोटिंदै
अनि आउन छोड्नेछन् ती आफै पनि दिक्क भै ।।

ऊ जिराहा भएदेखि तिमी बन्नू नकच्चरो
यो सूत्रको काम मानौं मुढाका निम्ति बञ्चरो ।।

ऊ सामु आउँदा चाहिं नुहुनू बाँसझैं बनी
सर का सर लाएर नमस्कार भनी भनी ।।

अप्ठेरै पारिहालेमा बिकेकाको दिनै पर्यो
यतिका दिन खेलायौ कमीशन लिनै पर्यो ।।

यो ता किताबको मात्रै पत्रिकाका कुरा अझ
कति खेला र झेला छन् भनुँला पछि ती सब ।।

काठमाडौं