नेपाली हास्यव्यङ्ग्य अनलाइन पत्रिका

१. नाटक किन
खेती गर्ने मानिसले व्यापार गर्ने नाटक किन
गोजी भर्ने मानिसले हकदार बन्ने नाटक किन
डाक्टर बनी के नै हुन्छ देश बेच्न तयार भए
मान्छे मार्ने मानिसले दिलदार बन्ने नाटक किन ?

२. आधि रहे
बाँकी रहे छायाहरू उडेपछि मायाहरू
सम्बन्धका बगैँचामा झारेपछि फूलहरू
गीतको अर्थ हरायो सङ्गीत थोत्रो हुँदा
आधी रहे तृष्णाहरू गुमेपछि चाहाहरू ।

३. जोकरहरूको लामबद्ध राज
एउटा आउँछ र भ्यागुताको टरटर फलाक्न थाल्छ
अर्को आउँछ र स्यालको हुइँया लगाएर दम्भ फाल्छ
कहिले स्विट्जरल्यान्ड बनाउने त कहिले सिङ्गापुर
लहरमा उभिन्छ र दुनियाँकै बकम्फुस रेलकथा थाल्छ ।

४. जल्नेहरू
जल्नेहरू जल्छन् दुनियाँसँग जल्नुबाहेक हुन्न केही
बदल्नेहरू बदल्छन् दुनियाँलाई बदल्नुबाहेक हुन्न केही
जल्नेहरू र बदल्नेहरू बीचमा खेल्नेहरू हुन्छन् कोही
जल्नेले बदल्नेहरूसँग जिन्दगीमा हार्नुबाहेक हुन्न केही ।

काठमाडौं