नेपाली हास्यव्यङ्ग्य अनलाइन पत्रिका

कैले तोला कैले मासा हुन्छिन मेरी प्रिया
भनेजस्तो न भएमा रुन्छिन मेरी प्रिया

झुक्किएर पनि जान्नन अक्षरको गाउँमा
महिषको भाषा मात्र सुन्छिन मेरी प्रिया

टुक्राहरू कलेजीका पुगे कता कता !
यही पीडा हिर्दयमा गुन्छिन मेरी प्रिया

दीर्घकालसम्म सहिन मेरो बदमासी
मलाई नै प्रेमहार बुन्छिन मेरी प्रिया

कति मिठो मुस्कान छ उस्तै प्यारा आँखा
कता कता भित्रैसम्म छुन्छिन मेरी प्रिया

गरेको छु अनुभूत उनको गाढा माया
मलाई त मुटुभित्रै थुन्छिन मेरी प्रिया

उचालेर गोबर्धन मेरो गृहस्थीको
प्रेमझरी बनी दुख धुन्छिन मेरी प्रिया /

चितवन

प्रेम दिवसे गजल

हिर्दयमा सुटुक्क आइदेउ भ्यालेन्टाइन डे मा
अजम्बरी पिरती लाइदेउ भ्यालेन्टाइन डे मा

सधैं तिम्रै देख्छु म सपना मेरी प्रियतमा
तिमि पनि मलाई नै चाहिदेउ भ्यालेन्टाइन डे मा

तिमी फुल हुन्छु म भमरा मरिलानु के छ
गुनगुनाउ यो गजल गाइदेउ भ्यालेन्टाइन डे मा

दुवै हामी घुमौला चुमुला आँखा चिम्लिएर
अधरको अमृत खाइदेउ भ्यालेन्टाइन डे मा

मन्त मेरो बहर साँढे भो बहकियो धेरै
बनि हाली यो गोरु दाइदेउ भ्यालेन्टाइन डे मा /

चितवन