झर्ला र खाउँला
दासताका दुई वर्ग छन् मेरा दृष्टिमा सँगी !
पहिलो बाध्यता नै हो र दोस्रो चाहिँ स्वैच्छिकी {{read_more}}
तत्कालै मुक्ति चाहन्छन् पहिलो वर्गकाहरू
दोस्राहरू भने खोज्छ्न् दासता लम्बियोस् अरू
वर्णनातीत पीडा छ पहिलो वर्गमा सधैँ
र दोस्रो वर्गका चाहिँ गर्व–आनन्दमा सधैँ
बाध्य दासहरू गर्छन् स्वामीप्रति घृणैघृणा
दास स्वैच्छिकको कामै प्रभुको अभिनन्दन
विरोधमा कसैले चूँं सम्म मात्रै गरे पनि
अरिङाल भई चिल्छन् पानीमुनि लुके पनि
मान्छेका रूपमा बाँच्ने चाहना बाध्य दासको
झर्ला र खाउँला भन्ने चाहना अन्य दासको
सिक्री फलामको नै होस् अथवा होस् सुवर्णको
“गलफन्दी“ कुरा कैल्यै कसरी हुन्छ गर्वको ?
दासता दासता नै हो जुन खाले भए पनि
पशुभन्दा अझै तल्लो “दास स्वैच्छिक”को जुनी