नेपाली हास्यव्यङ्ग्य अनलाइन पत्रिका

१. निर्वाचन ए, निर्वाचन, नरोउ न भन्या

चोरी, घूस कतै, कतै निरस ती खस्रा–रुखा भाषण !
कुर्सी–खेल कतै, कतै महलका अग्ला ठुला आसन !
भोको पेट कतै, कतै छ दिलको चित्कार, आश्वासन !
हाँस्यो ‘भोट’ बग्यो निस्शब्द कविता रोएछ निर्वाचन !!

२. छोप्ने कुरा छोप न

मुन्द्री छन् नि विशाल चक्र सरिका ती कानभन्दा ठुला !
छोटो त्यो तनको लुगा सँगसँगै भो बक्ष आधा खुला !!
यौवन् त्यो बिजुली सरी क्षणिक हो शालीनता रोप न !
भो छर्लङ्ग अनेक अङ्ग किन हो ? छोप्ने कुरा छोप न !

३. झुसेको बुद्धि ! …हा हा हा

मिल्नै पर्दछ गर्नुहुन्न झगडा लोग्ने र स्वास्नी पनि !
सम्झायो गुरुले त एक रथका पाङ्ग्रा दुई हुन् भनी !
गाडी मोटरमा रहन्छ जसरी पाङ्ग्रा जगेडा–बुझी !!
होला पन्चर एक सोचि घरमा ल्याएछ अर्की झुसी !!

४. भल्भ मुटुको

मायाले मुटुको विशाल ‘अरिकल’ टम्मै भरेको थिएँ !
आएछौ कि भनेर ‘भेन्ट्रिकल’मा खोज्दै झरेको थिएँ !!
बस्थ्यौ हैन र ? द्वारमा प्रियतमा तस्वीर तिम्रै थियो !
टालेनौ किन हो नि ‘भल्भ’ मुटुको माया थियो पोखियो !!

धनगढी