नेपाली हास्यव्यङ्ग्य अनलाइन पत्रिका

एक
जहिल्यै फूल फूल भन्नू हुन्छ कसरी त्यो नजर बसेको हो
यस्तै मरिहत्ते गरेर त भमरो फूलभित्र रातभर फसेको हो
सधै प्रीतिकर नहुन सक्छ फूलको सुगन्ध र सुवास पनि
बिर्सनु भयो र परिक्षितलाई फूलबाटै तक्षकले डसेको हो ।

दुई
स्वाभिमानका कुरा गर्दै दैनिक हातपाउ मल्नेहरू धेरै छौँ
शक्तिकेन्द्रका चरण कमलमा लम्पसार ढल्नेहरू धेरै छौँ
जस आफूले लिन र दोष अर्कालाई थुपार्न विसारद हामी
आफ्नो दुर्गतिमा भन्दा अरूको प्रगतिमा जल्नेहरू धेरै छौँ ।

तीन
समयलाई पराजित गर्न सकिएला जस्तो छैन
आफैलाइ विभाजित गर्न सकिएला जस्तो छैन
एकथोक देख्छु म दर्पणमा अर्कै भन्छ दुनियाँले
म मै हुँ भनेर प्रमाणित गर्न सकिएला जस्तो छैन ।