नेपाली हास्यव्यङ्ग्य अनलाइन पत्रिका

१.
यता झ्याल भयो छिर्ने, उता दैलो भयो
बाहिर मडारिन्छ कुहिरो, कैलो मैलो भयो
के नपुगेर जनतालाई, यत्रो त्रास दिँदै,
यति विघ्न मुलुकमा, भाँडभैलो भयो ?

२.
केही काम हुन्न हजुर ! अल्छी भएपछि
एक् दुई माछा परिहाल्ला, बल्छी भएपछि
दायाँबायाँ, तलमाथि हेर्दै गर्नुपर्छ,
फुत्तै भाग्न मिल्छ हेर, गल्छी भएपछि ।

३.
सानासाना नानी बाबु, दिनैदिन खोज्छन्
छैनहोला आफ्नो घरमा, खानपिन खोज्छन्
बाबू उता खाडीमा छ, चर्को घाम चुस्दै,
परिवारले साहुसँग, यता ऋण खोज्छन् ।

४.
घरमा छ नि पैसा टन्न, खान मिल्दैन
वर्षौं वर्ष लाग्छ गन्न, खान मिल्दैन
पैसै पैसा घरभरी, थुप्रियोस् त मित्र,
घरमा नजुटुञ्जेल् अन्न, खान मिल्दैन ।

५.
सुन्दैछु म उसको गोठमा, बूढो गोरु ब्यायो अरे
त्यो सुनेर छिमेकीले, यसो त्यता च्यायो अरे
त्यतिमात्र कहाँ हो र ? छिमेकीले फेरि थप्यो,
कोशी, काली, गण्डकी र, लाउडा काण्ड भ्यायो अरे ।

०००
माई न.पा.-१०, लुम्बाक, इलाम