नेपाली हास्यव्यङ्ग्य अनलाइन पत्रिका

निशा केसी :

१.
झिकेर कहिल्यै नरित्तिने त्यस्तो खानी हुँदैन
मरूभूमि बन्छ हृदय, जहाँ प्रेमील पानी हुँदैन
गर्दनै काटेर पाउमा ओच्छ्याए पनि के गर्नु !!
कसै कसैको यहाँ गुन सम्झने बानी हुँदैन ।

२.
राम छोडी सधैँ रावणको मात्र जय गर्नेसँग अहँ सकिन्न
रिस, राग, ईर्ष्या, जलन, शंका, भय गर्नेसँग अहँ सकिन्न
विश्वका कुनैपनि अस्पतालमा त्यस्तो रोगीको उपचार छैन
सुतेकालाई ब्युँझाउन सजिलो अभिनय गर्नेसँग अहँ सकिन्न ।

३.
विदेशी अत्तर किन्छन् यहाँ ,फूलको बाग बेचेर
कतिनजेल चल्छ गुजारा, जीवनका पराग बेचेर
ओ महासय, तपाईं देशमा अवसरै छैन भन्नुहुन्छ
हुर्काएको छु मैले मेरो सन्तानलाई मकै, साग बेचेर ।

०००
काठमाडौं