नेपाली हास्यव्यङ्ग्य अनलाइन पत्रिका

गाईघाट, उदयपुर ०८० साउन १४ । तीनतले उदयपुर संगीत केन्द्रद्वारा सञ्चालित त्रियुगा संगीत विद्यालयका निर्देशक शैलेन्द्रकुमार खतिवडाद्वारा लिखित ‘मेरो संगीत गुरु’ नामक पुस्तक आइतबार एक कार्यक्रमका बिच कोशी प्रदेशसभाका माननीय उपसभामुख सिर्जना दनुवारले विमोचन गर्नु भएको छ ।

साहित्य कला संस्कृति तथा गीत संगीत मानवीय जीवनका अत्यन्त महत्वपूर्ण पक्ष भएको र गीत संगीतले मानव जीवनलाई सार्थक बनाउँछ । स्रष्टालाई आफ्नो जीवन पर्यन्त पनि चिनाउने गीत संगीत जस्तो सिर्जनाले सर्जकलाई सधैँ अमर बनाउने कुरा प्रमुख अतिथि दनुवारले बताउनु भयो ।

तीनतले संगीत केन्द्रका अध्यक्ष श्याम बस्नेतको अध्यक्षतामा भएको सो कार्यक्रममा प्रमुख अतिथि दनुवारले साहित्य कला संस्कृतिका लागि आफूले गर्नु पर्ने सहयोग गर्ने र आफूलाई संसदीय विकास कोषमा प्राप्त बजेटबाट केही सहयोग उपलब्ध गराउने प्रतिवद्धता व्यक्त गर्नु भयो । यसैगरी सो कार्यक्रमका विशिष्ट अतिथि त्रियुगा नगरपालिकाका मेयर बसन्त बस्नेतले त्रियुगा नगरपालिकाले आफ्नो श्रोत साधनले भ्याएसम्म साहित्य कला संस्कृतिकालागि सहयोग गर्ने र जग्गा व्यवस्थापनका लागि पनि सहयोग गर्ने प्रतिवद्धता जनाउनु भयो ।

उक्त कार्यक्रममा तीनतले उदयपुर संगीत केन्द्रका अध्यक्ष श्याम बस्नेतले त्रियुगा संगीत विदालयका लागि वाद्यवादनका सामाग्री समेत हस्तान्तरण गर्नु भएको थियो । हस्तान्तरित सामाग्रीमा मादल १० थान, नाल ४ थान, तवला २ थान र हारमोवियम २ थान रहेका छन् ।

सो कार्यक्रममा विमोचित पुस्तकका बारेमा कटारी संगीत विद्यालयका प्रशिक्षक ध्रुव घिमिरेले समीक्षात्मक टिप्पणी गर्नु भएको थियो भने पुस्तकका प्रकाशक गायत्रा दाहाल खतिवडाले पुस्तक प्रकाशन गर्न लाग्दाका समस्या र पाएको सास्तीका बारेमा बोल्नु भएको थियो । यसैगरी पुस्तकका लेखक शैलेन्द्र कुमार खतिवडाले पुस्तक लेख्न सहज नभएको र सन्दर्भ सामग्री, श्रोत खोज्दा नै समय लागेको भए पनि आफ्नो उद्देश्य र लक्ष्य अनुसार पुस्तक प्रकाशन गर्न सफल भएको बताउनु भयो ।

त्रियुगा संगीत विद्यालयका सदस्य पुण्य पौडेलको सवगत मन्तव्यबाट शुरु भएको उक्त अवसरमा शुभकामना मन्तव्यका साथै रचना वाचन कार्यक्रम समेत भएको थियो । शुभकामना मन्तव्य सहित रचना वाचन गर्नेहरूमा महेन्द्र कुमार राई, वीरेन्द्रकुमार बस्नेत, राममणि पोखरेल, शंकर थापा, शारदाप्रसाद भट्टराई, उद्धव घिमिरे, माधव पोखरेल गोज्याङ्ग्रे, कीर्ति बहादुर खड्का, रमेशरञ्जन झा लगायतका रहेका थिए ।

सो अवसरमा त्रियुगा संगीत विद्यालयका प्रशिक्षार्थी भाइ बहिनीहरूले कार्यक्रमको बिच विचमा शेलेन्द्र खतिवडाद्धारा रचित र अन्य गीत वाद्यवादन सहित गाएर उपस्थित दर्शक श्रोताहरूलाई मनोरञ्जन प्रदान गरेका थिए । कार्यक्रमको सञ्चालन उदयपुर साहित्य कला प्रतिष्ठानका महासचिव माधव पोखरेल गोज्याङ्ग्रेले गर्नु भएको थियो ।

०००
– गोज्याङ्ग्रे