नेपाली हास्यव्यङ्ग्य अनलाइन पत्रिका

सप्तरी, २०८१ असाेज ३० । लप्रने (लघुकथा प्रतिष्ठान, नेपाल)द्वारा आयोजित लघुकथा प्रतियोगिताअन्तर्गत उत्कृष्ट १५ लघुकथा छनौट गरिएको छ ।

सामाजिक सञ्जालमा सञ्चालित लप्रनेद्वारा तेस्रो वार्षिकोत्सवका अवसरमा आयोजित लघुकथा प्रतियोगिताको प्रथम चरणबाट उत्कृष्ट १५ लघुकथाको छनौट गरिएको हो ।

प्रकृति केन्द्रित उत्कृष्ट लघुकथाको खोजीमा रहेको प्रतिष्ठानले भदौ १८ देखि असोज १८ गतेसम्म लघुकथा पोष्ट गर्न आह्वान गरेको थियो । प्रतिष्ठानले तेस्रो वर्ष पूरा गरी चौथो वर्षमा प्रवेश गर्न लागेको अवसर पारेर प्रतियोगिता आयोजना गरेको हो ।

यिनै लघुकथाहरू मध्ये एक सर्वोत्कृष्टलाई तीन हजार रूपियाँ नगदसहित सम्मानोपहार प्रदान गरिने प्रतिष्ठानकी व्यवस्थापक रचना शर्माले जानकारी दिनुभएको छ ।

कथावस्तु, रूपविधान, संरचना, विषयवस्तुको नवीनता, भाषिक प्रवाह, विषयको सर्वकालिकता, कथावस्तुले उत्पन्न गराउने कौतूहलता, विचार तथा सामाजिक पक्षका आधारमा उत्कृष्ट ठहरिएका लघुकथाहरूलाई ‘उत्कृष्ट १५’मा समेटिएको निर्णायकहरूले बताउनुभएको छ ।

पहिलो चरणमा उत्कृष्ट ठहरिएका १५ लघुकथा निर्णायक संयोजकलाई जिम्मा लगाइएको र सोही मध्येबाट ‘सर्वोत्कृष्ट’को छनौट गरिने व्यवस्थापक मनोहर पोखरेलले बताउनुभएको छ । उत्कृष्ट १५ लघुकथाबाट विशेष निर्णायक समितिले ‘सर्वोत्कृष्ट लघुकथा’को घोषणा तेस्रो वार्षिकोत्सवको अघिल्लो दिन कात्तिक २ गते गर्ने छ ।

२०७८ कात्तिक ३ गते स्थापित प्रतिष्ठानले निरन्तर एकै दिन नबिराई १ हजार ९३ श्रृङखला लघुकथा वाचनविमर्श गराइसकेको छ । लप्रनेका सञ्चालक समितिका सदस्य लक्ष्मी रिजालले दिनुभएको जानकारी अनुसार प्रतियोगितामा सहभागी सबै लघुकथाहरू सन्दर्भ पत्रिकाको नयाँ अङ्कमा समेटिने छ । उक्त अवधिमा पोस्ट भएका चार दर्जन प्रतियोगी र सोही संख्यामा सहभागी अप्रतियोगी लघुकथा समेटी ’सन्दर्भ’ पत्रिका प्रकाशन हुने छ ।
लघुकथामा लप्रने निरमलन समूह नामक समूहले व्यवस्थापन गर्दै आएको प्रतिष्ठानले विगतमा समेत विविध प्रतियोगिता सञ्चालन गर्दै आएको थियो ।

विगतका प्रतियोगितामा चट्याङ मास्टर र प्रा.डा.मुकेश चालिसेद्वारा पुरस्कार प्रायोजन गरिएको थियो । तेस्रो वार्षिकोत्सवको पुरस्कार सुनसरी निवासी हाल लन्डनलाई मुकाम बनाउनुहुने रुद्र अधिकारी ’निर्दोषी’ले प्रायोजन गर्नुभएको हो । हालै उहाँको लघुकथा सङ्ग्रह ’दृष्टि’ प्रकाशन भएको छ । नेपाली पाठक माझ लघुकथा विधामा उहाँ मौलिक छाप छाड्न सफल हुनुहुन्छ ।

भिन्नभिन्न सन्दर्भ अभियानमार्फत उत्कृष्ट लघुकथा घोषणा गर्दै, प्रशिक्षण दिँदै, सम्मान गर्दै लघुकथा प्रतिष्ठान, नेपाल आगामी कात्तिक ३ गतेदेखि तेस्रो वर्ष पुरा गरेर चौथो वर्षमा प्रवेश गर्दैछ ।

व्यवस्थापक सदस्य नन्दलाल आचार्यबाट प्राप्त जानकारी अनुसार लघुकथा प्रतिष्ठान, नेपालको तेस्रो वार्षिकोत्सवको अवसरमा प्रेषित प्रकृति केन्द्रित प्रतियोगी लघुकथाहरू मध्ये प्रथम चरणबाट छानिएका उत्कृष्ट १५ लघुकथा यस प्रकार छन् –
उत्कृष्ट १५ लघुकथाहरू :-
क) धर्म, ख) घर फर्कंदा, ग) शक्तिशाली, घ) पहिचान ङ) ढप, च) परिपुरक, छ) प्रकृति, ज) रहस्य, झ) प्रवृति ञ) बिद्रोह, ट) प्रकृति, ठ) बाकस, ड) मित्र, ढ) खेती, ण) बसाइँ ।

०००
– पुनम पोखरेलद्वारा संप्रेषित