नेपाली हास्यव्यङ्ग्य अनलाइन पत्रिका

भित्री जीवनको रहस्य जसले जानीबुझी सारमा
पार्दै उत्तम देह कर्म बलले लाग्दै सदाचारमा
निष्ठावान बनेर प्रेरित बनुन् बाटो उज्यालो लिने
सारा वृद्ध सुपूज्य हुन् अवनिका देवत्वमा पौँचिने ।।१

जो कालो धनमा रमाउँछ हरे बाटोलिदै भोसिने
पर्ला नर्क अवश्य भ्रष्ट मनुवा दुष्कर्ममा हौसिने
कर्मैले नर राम रावण यहाँ हुन्छन् सदा देखिने
सारा वृद्ध सुपूज्य हुन् अवनिका देवत्वमा पौँचिने ।।२

बोलुन् सत्य डटेर लोक हितमा ठाडो गराई शिर
माया मोह भरेर योग बलले पारुन् घरै मन्दिर
आफैँ बन्न सकुन् उदाहरण नै फैलेर शिक्षा दिने
सारा वृद्ध सुपूज्य हुन् अवनिका देवत्वमा पौँचिने ।।३

लेशै बन्दछ लोभ पाप जसमा नामेट तृष्णा जती
गर्छन् बात अनेक लोकहितका ज्ञानी गुनीझैँ अति
सुम्पिन्छन् उपदेश रोज जनमा बाटो सुनौलो लिने
सारा वृद्ध सुपूज्य हुन् अवनिका देवत्वमा पौँचिने ।।४

बोल्दैनन् अपराधका वचन जो झूटो र भाम्रो पनि
राखी ईश्वर बस्दछन् हृदयमा अत्यन्त चोखो बनी
गर्छन् लोकविवादमा पनि सधैँ निष्पक्ष भै उभ्भिने
सारा वृद्ध सुपूज्य हुन् अवनिका देवत्वमा पौँचिने ।।५

पाका मानिसका सफा हृदय नै हुन् ईशका मन्दिर
पाइन्नन् दिलमा कटार खुकुरी भाला तथा जन्जिर
कालोकल्मषले छुदैन मनमा छन् घाम नै चम्किने
सारा वृद्ध सुपूज्य हुन् अवनिका देवत्वमा पौँचिने ।।६

०००
भक्तपुर