नेपाली हास्यव्यङ्ग्य अनलाइन पत्रिका

फेरिन्छन् सब सृष्टिका सुरचना फेरिन्छ देही पनि
हामी वास्तव पाहुना अवनिका यात्रा त हो जीवनी
लीला गर्दछ जिन्दगी मनुजको चोला अनौठो छ नि
चिन्ता गर्नु हुँदैन धेर नरले लाग्यो बुढ्यौली भनी ॥१

साधा जीवन भोग्नु लोक सबले यो देह पाको हुँदा
जातीहुन्न हतास बन्नु कहिल्यै जस्तै दशाले छुँदा
सारा जीवन भोग्नुपर्छ जनले हाँसो खुसीमा अनि
चिन्ता गर्नु हुँदैन धेर नरले लाग्यो बुढ्यौली भनी ॥२

पाएको जुन जिन्दगी छ नरको सन्तुष्ट आफू बनौँ
लागेको मनमा छ जो जटिलता फोई अरूमा भनौँ
सन्तोषी पनले प्रशन्न मनले मिल्ने छ सञ्जीवनी
चिन्ता गर्नु हुँदैन धेर नरले लाग्यो बुढ्यौली भनी ॥३

साधा जीवन भोग्नुपर्छ सबले यो देह पाको हुँदा
जाती हुन्न हतास बन्नु सहसा जस्तै दशाले छुँदा
बाँचौँ है जतिसम्म जीवन रहे हाँसी खुसी नै बनी
चिन्ता गर्नु हुँदैन धेर नरले लाग्यो बुढ्यौली भनी ॥४

मान्छे अम्मर बन्छ कीर्ति यश क्यै छोडेर जाने भए
राम्रो काम गरेर देश जनको उत्थानमा होमिए
आफैँ पुग्नु छ हेर उच्च गिरिमा बाटो सुनौलो खनी
चिन्ता गर्नु हुँदैन धेर नरले लाग्यो बुढ्यौली भनी ॥५

००
भक्तपुर