नेपाली हास्यव्यङ्ग्य अनलाइन पत्रिका

यिनै द्यौता मेरा विपुल अवनिका जन्मदाता विधाता
यिनैले सुम्पेको हृदय बिच महान् रक्तको देख्छु नाता
धरी आस्था ज्यादा विनित मन बसेँ प्रेमले वन्दनामा
पुजारी हूँ यौटा प्रतिदिन म यहाँ पुज्छु बाबा र आमा ॥१

धरामा टेक्ने यो अवसर पहिले हो उनैले दिएको
लुकाई छातीमा गुटुमुटु सहसा हो उनैले लिएको
उनैको हो छाती उपर रगतको धार बग्ने नशामा
पुजारी हूँ यौटा प्रतिदिन म यहाँ पुज्छु बाबा र आमा ॥२

तिनैले हो मेरो सुख सयल भनी दर्द लाखौँ सहेको
उनैको टेवाले लगन र भरले आज जे हो भएको
विना बाबा आमा नर प्रकटहुने छैन सम्भावनामा
पुजारी हूँ यौटा प्रतिदिन म यहाँ पुज्छु बाबा र आमा ॥३

नलाउन् है कोही पनि नरजनले चोट ती भावनामा
सबैको दैलोमा सुजन यति बुढा पाउनै हुन्छ धामा
नबिर्सौँ कर्तव्यै पद अनि धनको मोहमा लालसामा
पुजारी हूँ यौटा प्रतिदिन म यहाँ पुज्छु बाबा र आमा ॥४

बुढ्यौलीमा मान्छे अतिशय गुणले खारिएका हुनेछन्
दिई अर्ती राम्रो विविध किसिमका विघ्नबाधा फुनेछन्
मलाई आस्था यो अधिकतम भयो जे छ त्यो देवतामा
पुजारी हूँ यौटा प्रतिदिन म यहाँ पुज्छु बाबा र आमा ॥५

०००
भक्तपुर