नेपाली हास्यव्यङ्ग्य अनलाइन पत्रिका

देवीप्रसाद मिश्र :

परजीवी हुँदा घरका समस्या

आशाको टुकुरो विशेष घरको हाम्रो मजाको ठिटो ।
खाने छैन लिटो दगुर्दछ छिटो खोज्दै विदेशी पिठो ॥
आमा छिन् घरमा अशक्त तनमा,रानी बुहारी पनि ।
मायाकी हजुरी,विदेश रहँदा जान्छिन् सुसारे बनी ॥९६॥

सासू दीर्घ बिराम दुःख घरमा जाँदा बुहारी पर ।
लट्टा पर्छ कपाल कोर्नु कसरी के उठ्न सक्थे कर ॥
गर्छिन् फोन यदाकदा कुलवधू कस्तो छ चल्दै घर ।
मेरो ता व्यवसायको तय भयो शृङ्गारको पार्लर ॥९७॥

स्नेही ग्राहक छन् मुमासरहका लाग्दैन खासै डर ।
गर्छन् आदर नित्य ढुक्क छु म ता आफ्नो सुरक्षा गर ॥
नानी बाबुहरू नहून् कुलतमा सम्पूणर् तिम्रो भर ।
भन्छिन् खर्च पठाउँला समयमा के नै समस्या छ र ? ॥९८॥

के सुन्छन् र कुरा बुढा मगजका साथै भएका भुरा ।
ठान्छन् व्यर्थ झुरा असभ्य मुजुरा हान्छन् कुराले छुरा ॥
आमाले परदेशमा कठिनले जस्तै गरून् आर्जन ।
बच्चाको नतिजा विलक्षण भए के काम लाग्यो धन ॥९९॥

हे हाम्रा तनया वधू र भगिनी भान्जीहरू छौ घर ।
जाँदा, अर्थ कमाउने विषयमा यो ख्याल राम्रो गर ॥
रातै बन्द छ बाघको मुख सदा खाए नखाए पनि ।
बच्चाको जग बिग्रियो यदि भने फोस्रो हुने जीवनी ॥१००॥
(क्रमशः)

०००
२०८०/२/१५
ताप्लेजुङ, हाल- काठमाडौं