नेपाली हास्यव्यङ्ग्य अनलाइन पत्रिका

हरिप्रसाद रिमाल  :

सम्मान वृद्धवृद्धाको गरौँ सोची न हौँ पर
आयु यश र विद्याको वृद्धि होला निरन्तर ॥१

सक्छौँ सेवा गरौँ साथै बसौँ सोधौँ सबै कुरा
मर्यादा चित्तले राखौँ ज्ञानी बन्छौँ सबै भुरा ॥२

आज्ञा पालनले बन्छौँ सभ्य मानव निश्चित
हाम्रो जीवनको मार्ग खुला बन्छ गरे हित ॥३

माया मात्र गरे मिल्ला आशीर्वचन प्रेमले
मन्त्रझैँ हुन् बुढा पाका ज्ञान पुञ्ज उमेरले ॥४

स्वयम् पुस्तक हुन् जाने नबुझ्ने मूर्ख मानव
हुन् ठानिन्छन् तिनै मान्छे कुकर्मी दुष्ट दानव ॥ ५

बिरुवा प्रेमको रोपौँ हुर्किन्छ फल फल्दछ
बेलामा रोपिए कर्म फुलेर फल पाक्दछ।६

आँखा हुन् सबका हाम्रा बुढापाका सबै जन
सुरक्षा गर्नमा लागौँ मान सम्मान सत् धन ॥७

अरबौँ धनको रास लाएर हुन्छ के ? भन
जाँदा खाली सबै जान्छौँ लान पाइन्छ त्यो धन ।८

०००
झापा