बा आमा
पिता र मातृ नम्य हुन्, एकाग्र चित्त शान्तिका । इलाज दिव्य वाण हुन्, कुकर्म चाल भ्रान्तिका ॥ जु्टेर शान्ति बागमा, विकास वृक्ष रोप्नु छ । पिता र मातृ ईश हुन्, भनेर पुज्नु पर्दछ ॥
कृष्णप्रसाद पौडेल
(पिता र मातृ ईश हुन्, भनेर पुज्नु पर्दछ)
छ भक्तिभाव वन्दना, पिता र मातृ वर्गमा ।
छ ढोग नित्य पाउमा, धरेर गाथ माथमा ॥
गरेर उच्च प्रार्थना, अगाध प्रेम गर्नुछ ॥
पिता र मातृ ईश हुन्, भनेर पुज्नु पर्दछ ॥-१
प्रणाम गर्छु श्यामको, पिता र मातृ ईशको ।
अपार प्रेम लाग्छ झन्, छ गर्व जन्म भूमिको ॥
अनेक कष्ट विध्नका, निदान खोज्नु पर्दछ ।
पिता र मातृ ईश हुन्, भनेर पुज्नु पर्दछ ॥-२
पिता दयालु कृष्णझैँ, ल मातृ हुन् नि राधिका ।
बुबा मुमा मुहान हुन्, कला र दिव्य ज्योतिका ॥
उदात्त भक्तिभावले, समग्र शिल्प सिक्नु छ ।
पिता र मातृ ईश हुन्, भनेर पुज्नु पर्दछ ॥-३
प्रत्यक्ष भेट्न सक्छ को, महेश दिव्य रूपको ?।
सकिन्छ देख्न नेत्रले, पिता र मातृ ईश जो ॥
विशाल दिव्यदृष्टिले, अनन्त सत्य बुझ्नु छ ।
पिता र मातृ ईश हुन् , भनेर पुज्नु पर्दछ ॥-४
पिता र मातृ मूल हुन्, मनुष्य जन्म सृष्टिका ।
असीम प्रेमभावका, प्रकाश हुन् नि शक्तिका ॥
उदारवाद कर्मका, भनी पुकार्नु पर्दछ ।
पिता र मातृ ईश हुन्, भनेर पुज्नु पर्दछ ॥-५
पिता र मातृ स्रोत हुन्, दया र मेल यारका ।
प्रसिद्ध योग्य विज्ञ हुन्, प्रयत्नशील धारका ॥
समग्र शिल्प कर्मले, प्रभात डाक्नु पर्दछ ।
पिता र मातृ ईश हुन्, भनेर पुज्नु पर्दछ ॥-६
पिता र मातृ नम्य हुन्, एकाग्र चित्त शान्तिका ।
इलाज दिव्य वाण हुन्, कुकर्म चाल भ्रान्तिका ॥
जु्टेर शान्ति बागमा, विकास वृक्ष रोप्नु छ ।
पिता र मातृ ईश हुन्, भनेर पुज्नु पर्दछ ॥-७
०००
बट्टार, नुवाकोट
हालः-बालाजु, काठमाडौं ।
मोबाइल नं. ९८४१७५८१८४