नेपाली हास्यव्यङ्ग्य अनलाइन पत्रिका

देवीप्रसाद मिश्र  :

शिक्षा आर्थिक खोजमा पर गयौ कस्तो छ चल्दै पला ?।
पार्‍यौ पूर्ण घडा अवश्य भतिजा साधेर राम्रो कला ॥
भारी नित्य बिसाउँदै छु दिलका मानेर तिम्रो भर ।
आमा जन्मदिने र जन्म धरणी सम्झेर आऊ घर ॥१५७॥

बन्छन् सक्षम राष्ट्रचालक यता बाल्छन् धरामा दियो ।
भन्ने आस थियो मिलेन नतिजा आस्था गलेझैँ भयो ॥
साथैका, जल वृक्षको मुलुकको गुम्दै गयो आदर ।
आमा जन्मदिने र जन्म धरणी सम्झेरआऊ घर ॥१५८॥

पाखामा भिरमा ठुला चउरमा छन् रत्न संरक्षण ।
हुन्छन् औषध यत्नले गर यतै सम्पूणर् अन्वेषण
त्यो विज्ञान कला त्यतै दिनपला अर्पेर के हुन्छ र ?
आमा जन्मदिने र जन्म धरणी सम्झेर आऊ घर ॥१५९॥

खोज्दा पाखनबेत अक्कर भरी छन् आडमा हड्चुर ॥
हर्रो या अमला प्रशस्त वनमा बर्रो पखेरा भर ॥
मिल्छन् औषध छैन सञ्चित यता ज्ञानी युवा छौ पर ।
ल्याऊँ यी उपभोगमा अब छिटो फर्केर आऊ घर ॥१६०॥

कुड्की या बिखमा, हिमालय भरी छन् पाँच औँले बुटी ।
त्यस्तै नै ढकमक्क झन् पदमचाल् जम्मा गरौँला जुटी ॥
यार्चागुम्बु चिराइतो वन भरी छन् सम्पदा सुन्दर ।
ल्याऊँ यी उपभोगमा अब छिटो फर्केर आऊ घर ॥१६१॥

भेटिन्छन् अझ राजवृक्ष कुरिलो पिप्ला र गुर्जो अनि ।
बोझो झन् तुलसी विशेष अदुवा त्यो दालचीनी पनि ॥
आफ्नै जाँगरले प्रशोदित गरे जीवन्तिका छन् भर ।
आमा जन्मदिने र जन्म धरणी सम्झेर आऊ घर ॥१६२॥

हाम्रै खातिरमा दिइन् प्रकृतिले यस्ता अनेकौँ बुटी ।
आफैँ सञ्चय गर्न थाल्नुछ यता पाका युवाले जुटी ॥
नागी पर्वत ओसिला चउरले माग्छन् युवाको भर ।
आमा जन्मदिने र जन्म धरणी सम्झेर आऊ घर ॥१६३॥

सम्झन्छन् जहिल्यै-गुराँस वनले त्यस्तै बुकीफूलले ।
उम्दा ताल नदी समस्त झरना धारा कुला मूलले ॥
सिम्ले खेत रुँदै छ झन् विरहमा माग्दै युवाको भर ।
आमा जन्मदिने र जन्म धरणी सम्झेर आऊ घर ॥१६४॥

(क्रमशः)

०००

२०८०/६/११,

हाल : काठमाडाैं